सुरेश मिसाळ : महान्यूज लाईव्ह
कुडाच्या दहा बाय दहा फुटाच्या पत्रा असणाऱ्या अतिशय छोट्या खोलीत प्रापंचिक सामान ठेवून कसेबसे राहणाऱ्या व अधिकारी होण्याचे स्वप्न बाळगून कल्याणी ने जिद्दीने अभ्यास केला आणि दहावीच्या परीक्षेत शंभर टक्के गुण मिळवले.
सगळ्या सुविधा असल्यावरच मुलं हुशार होतात, असं अजिबात नाही.. कधीकधी जगण्याची लढाई मुलांना उच्च गुणवत्तेकडे धाव घेण्यासाठी प्रेरित करत असते..बावडा येथील गरीब कुटुंबातील कल्याणी तुकाराम माने हिने दहावीच्या परीक्षेत 100 टक्के गुण मिळवून राज्यात प्रथम क्रमांक मिळविला.
बावडा येथील श्री शिवाजी विद्यालयात शिक्षण घेणाऱ्या कल्याणीचा तिच्या सुरवड येथील घरी जाऊन माजी मंत्री हर्षवर्धन पाटील यांनी सत्कार केला व तिचे अभिनंदन केले. एवढेच नव्हे, तर कल्याणी माने हिचा इ. 11वी. व 12 वी.चा शिक्षणाचा खर्च श्री शिवाजी एज्युकेशन सोसायटी करणार असल्याचे हर्षवर्धन पाटील यांनी जाहीर केले.
यावेळी हर्षवर्धन पाटील यांनी कल्याणी चे वडील तुकाराम माने व कुटुंबियांशी संवाद साधला. या वेळी तिने भारतीय प्रशासकीय सेवेत (आयएएस) जाऊन अधिकारी होण्याचा मानस असल्याचे हर्षवर्धन पाटील यांना सांगितले.
बावडा येथील श्री शिवाजी एज्युकेशन सोसायटी संचलित श्री शिवाजी विद्यालय व कनिष्ठ महाविद्यालयाची इ. 10 वी.ची कल्याणी माने विद्यार्थिनी आहे. या शिक्षण संस्थेचे हर्षवर्धन पाटील हे अध्यक्ष आहेत. इतर वेगळा क्लास न लावता, विशेष मार्गदर्शन नसताना व दहा बाय दहा फुटाच्या कुडावरती पत्र्याचे छप्पर असलेल्या खोलीत राहून तिने गरीब परिस्थितीत राज्यात मिळविला प्रथम क्रमांक ही विशेष अभिनंदनीय बाब असल्याचे हर्षवर्धन पाटील यांनी सांगितले.
कल्याणी माने हीच्या राहत्या घराची स्थिती पाहून हर्षवर्धन पाटील यांनी उपस्थित ग्रामपंचायत पदाधिकाऱ्यांना माने कुटुंबीयांना घरकुल देण्याची सूचना केली. याप्रसंगी नीरा-भीमा कारखान्याचे संचालक उदयसिंह पाटील, संस्थेचे सचिव सरपंच किरण पाटील, दादासाहेब घोगरे, सुरेश मेहेर, सुरेश घोगरे, रावसाहेब घोगरे, दशरथ घोगरे, प्रकाश घोगरे, जी.जे.जगताप उपस्थित होते. कल्याणी माने हिने बावडा येथील श्री शिवाजी विद्यालय व कनिष्ठ महाविद्यालयात पुढील शिक्षणासाठी प्रवेश घेतला आहे.
