मत्स्य विभागाचे राज्यमंत्री दत्तात्रय भरणे यांच्याशीही केली सोनवणे यांनी चर्चा
इंदापूर : महान्यूज लाईव्ह
पळसदेव भागातील शेलारपट्टा येथील शेतकरी संजय एकनाथ शेलार यांच्या शेततळ्यावर पिपल्स रिपब्लिकन पार्टीचे पश्चिम महाराष्ट्र अध्यक्ष संजय सोनवणे यांनी काल बुधवारी (दि.11) संजय शेलार यांची भेट घेऊन दिलासा दिला.सोनवणे यांनी मत्स्य राज्यमंत्री दत्तात्रय भरणे यांच्याशी तात्काळ फोन केला व मदत मिळण्यासाठी चर्चा केली.
यावेळी इंदापूर पोलीस प्रशासनाने नुकसान करणाऱ्या संबंधित आरोपीस तात्काळ शोधून काढावे तसेच मत्स्यव्यवसाय विभागाने शेलार यांना मदत करावी अशी मागणी संजय सोनवणे यांनी केली.
संजय शेलार यांच्या शेततळ्यात अज्ञातांनी टाकलेल्या विषारी औषधामुळे सुमारे पाच टन मासे मृत्युमुखी पडले. हा प्रकार धक्कादायक असल्याचे संजय सोनवणे यांनी भेटीप्रसंगी सांगितले.
संजय शेलार यांचे शेलार पट्टा भागात शेततळे आहे.या शेततळ्यात आठ महिन्यांपूर्वी त्यांनी रूपचंद जातीचे ३० हजार बीज सोडले होते.मात्र कोणीतरी विषारी औषध टाकल्याने मासे मृत्युमुखी पडले.
सोमवारी सकाळी माशांना खाद्य देण्यास गेल्यानंतर सदरचा प्रकार त्यांच्या लक्षात आला. या भेटीच्या वेळी संजय सोनवणे यांनी शेततळ्याची पाहणी केली तसेच शेतकरी शेलार यांचेशी चर्चा केली व लगेच दुरध्वनीवरुन झालेला प्रकार इंदापुर पोलीस स्टेशनचे पोलीस निरीक्षक धन्यकुमार गोडसे यांच्या कानावर घातला व लवकरात लवकर आरोपी शोधुन त्याच्यावर कठोर कारवाई करण्याची मागणी केली.
राज्यमंत्री दत्तात्रय भरणे यांच्या देखील कानावर झालेला प्रकार घातला व मत्स्यव्यवसाय विभागाकडून मदत करण्याची विनंती केली. शेतीला जोडधंदा म्हणून मत्स्य शेतीकडे पाहिले जाते खूप कष्ट करून मत्स्य पालनाकडे लक्ष दिले जात असते.
दिवसेंदिवस शेतकऱ्यांची परिस्थिती बिकट होत चालली आहे. अशातच मत्स्य पालनातून चार पैसे मिळतील या उद्देशाने मत्स्यशेती करणाऱ्या संजय शेलार यांच्या शेततळ्यात विषारी औषध टाकून नुकसान करणे कुणालाच न पटण्यासारखे आहे, असे मत संजय सोनवणे यांनी व्यक्त केले.
