इंदापूर : महान्यूज लाईव्ह
वै.शेरकरबाबा महाराज समाधी मंदिर हे इंदापूर – अकलूज मार्गावर वकिलवस्ती(सुरवड) येथे आहे. हे समाधी मंदिर श्री.संतश्रेष्ठ जगद्गुरु तुकाराम महाराज पालखी महामार्ग 965 जी मध्ये गट नं. 10 भूसंपादनामध्ये बाधीत होणार आहे.
मंदिर वाचवण्यासाठी समाधी शेजारील शेतकरी पालखी मार्गासाठी स्वतःची जागा देण्यास तयार आहेत. हे समाधी मंदीर समस्त वारकरी सांप्रदायाचे दैवत असून ते वाचवण्यात यावे अशी मागणी वै. शेरकरबाबा सेवाभावी ट्रस्ट व वै.शेरकरबाबा समाधी मंदिर बचाव समिती तसेच समस्त वारकरी सांप्रदाय यांच्या वतीने इंदापूरचे तहसिलदार अनिल ठोंबरे यांच्याकडे निवेदनाद्वारे करण्यात आली आहे.
या मागणी संदर्भात रविवार दि. 15 ऑगस्ट 2021 रोजी समाधी मंदिर परिसरात एक दिवसीय लाक्षणिक उपोषण करण्याचा इशारा भक्तगणांनी दिला आहे.
या संदर्भात बोलताना वै.शेरकरबाबा महाराज यांचे अनुयायी ह.भ.प.ज्ञानदेव नामदेव शेरकर म्हणाले की, वै.शेरकरबाबा महाराज समाधी मंदिर हे स्वातंत्र्यपूर्व काळापासून आजमितीला संपूर्ण वारकरी सांप्रदायाचे दैवत, आशास्थान, प्रेरणास्थान, श्रद्धास्थान म्हणून या ठिकाणी आहे.
ही समाधी हलविण्याचा जर प्रयत्न झाला तर समस्त वारकरी सांप्रदायाच्या भावनेला तडा जाईल. हे मंदिर वाचवण्यासाठी जगद्गुरू श्री संत तुकाराम महाराज संस्थान, श्रीक्षेत्र देहू यांनी देखील 15 जाने 2021 रोजी उपमुख्यमंत्री अजित पवार यांना पत्र पाठवले आहे.
श्री. संतश्रेष्ठ तुकाराम महाराज पालखी सोहळा येथून जाताना या मंदिरामध्ये आरतीसाठी पालखी थांबून पंढरपूरकडे मार्गस्थ होते. वै.शेरकरबाबा महाराज हे आमचे दैवत असून या ठिकाणाहून जाणारा पालखी महामार्ग हा मंदिराला बाधा न होता आपण इतर मार्गाने नियोजन करुन मंदिर वाचविण्याचा प्रयत्न करावा.
मंदिर वाचविण्यासाठी पूर्व बाजूस असलेले शेतकरी पालखी महामार्गासाठी स्वतःची जमीन देण्यास तयार आहेत आणि ती जर जमिन वापरात आली तर पालखी महामार्गास जे वळण बसणार आहे ते सरळ होण्यास मदत होणार आहे.
याच्यावर कार्यवाही झाली नाही तर रविवारी 15 ऑगष्ट 2021 रोजी टाळ मृदुंगाच्या गजरामध्ये हरिनामरुपी जागर वै. शेरकरबाबा महाराज समाधी मंदिरासमोर करित एक दिवसीय लाक्षणिक उपोषण करणार असल्याचे निवेदनात म्हटले आहे..
