संपादकीय
11 वेळा विधानसभा आणि 54 वर्षांची प्रदीर्घ राजकीय कारकीर्द गाजवून 94 वर्षांच्या भाई गणपतराव देशमुख यांनी आज अखेरचा श्वास घेतला. दोन दिवसांपासून त्यांची प्रकृती चिंताजनक होती. डाव्या चळवळीचे अध्वर्यू आणि माजी मंत्री असलेले भाई गणपतराव देशमुख राजकारणातील आदर्श आधारवड होते.
वयाच्या 94 व्या वर्षी देखील लोकहितासाठी सक्रिय असलेल्या आमदार देशमुख यांनी 2018 च्या निवडणुकीत मात्र निवडणूक न लढवण्याचा निर्णय घेतला होता. काही दिवसांपूर्वी त्यांना पित्ताशयाचा त्रास होत असल्याने सोलापूरला अश्विनी हॉस्पिटलमध्ये दाखल करण्यात आले होते. त्यानंतर त्यांच्यावर शस्त्रक्रिया देखील करण्यात आली. मात्र त्यानंतर त्यांची प्रकृती ढासळली होती. ती जास्त खालावत जाऊन आज त्यांचे निधन झाले.
विधानसभेवर एकाच मतदारसंघातून सर्वाधिक वेळा निवडून येण्याचा करुणानिधी यांचा विक्रम शेतकरी कामगार पक्षाचे आमदार गणपतराव देशमुख यांनी मोडला होता. सलग अकराव्यांदा त्यांनी सांगोला मतदारसंघातून विक्रमी विजय मिळवला होता. अत्यंत साधी राहणी आणि उच्च विचारसरणी या गणपतराव देशमुख यांनी तब्बल 54 वर्षे सांगोल्याचे प्रतिनिधित्व केले.
अकराव्या निवडणुकीत 2014 मध्ये देखील त्यांनी मोदी लाटेत 94 हजार 374 मते मिळवली होती. देशमुख सांगोल्यातून पहिल्यांदा 1962 साली विजय झाले. त्यानंतर 1972 आणि 1995 चा अपवाद वगळता प्रत्येक निवडणुकीत सांगोलाकरानी त्यांना भरभरून मते दिली होती. 1978 मध्ये शरद पवारांच्या पुलोद सरकारमध्ये आणि 1999 मध्ये काँग्रेस आघाडी सरकारमध्ये शेकापचे गणपतराव देशमुख मंत्रिमंडळात सहभागी झाले होते.
