ऑनलाईनच्या आभासी जगापासून दूर रहा; पोलीस निरीक्षक चंद्रशेखर यादव यांचे आवाहन
नगर : महान्यूज लाईव्ह
2 दिवसात 3 मुलींना अशा फसवणुकीपासून कर्जत पोलिसांनी वाचविले. पालकांच्या डोळ्यात अक्षरशः पाणी आले, त्यांनी कर्जत पोलिसांचे आभार मानले.. पण गोष्ट एवढ्यात संपत नाही, सोशल मिडियाच्या फेसबुक, इंस्टाग्राम, व्हाट्सअप, शेअर चॅट आदी माध्यमातून संदेश पाठवून विशेषतः मुलींचे मोबाईल क्रमांक मिळवले जातात.. संभाषण वाढवले जाते.. प्रेमाच्या आणाभाका घेतल्या जातात आणि संधी साधून या मुलींना फूस लावून पळविले जाते..!
जे शहरी भागात चालले आहे, त्याचे लोण ग्रामीण भागातही येऊ लागले आहे आणि जे आभासी दिसते, त्यावर भाळुन मुलीदेखील अशा ऑनलाइन चॅटिंग च्या गुन्ह्यात अडकत आहेत आणि आपले आयुष्य पणाला लावत आहेत.. अशा मुलींना धडा शिकवणाऱ्या घटना कर्जत तालुक्यात मागील दोन दिवसात घडल्या…!
ऑनलाइन चॅटिंग मुळे प्रेमात पडून आपले आयुष्य पणाला लावणाऱ्या मुलींच्या बाबतीत तर नंतरच्या काळात अशा मुलांचे अगोदरच विवाह झालेले आहेत किंवा अशी मुले अनेक गुन्ह्यांमधील आरोपी आहेत अशा स्वरूपाची माहिती नंतर उघड होते. मात्र तोपर्यंत वेळ निघून गेलेली असते. अशा ऑनलाईन आणि आभासी दुनिया वरील विश्वास उघड्या डोळ्यांनी तपासा असे आवाहन कर्जतचे पोलिस निरीक्षक चंद्रशेखर यादव यांनी केले आहे.
त्यांनी केलेल्या कामगिरीने अनेक पालकांच्या डोळ्यात अक्षरशः पाणी आले. कारण चंद्रशेखर यादव यांनी पिंपरी चिंचवड येथील एका विवाहित इसमाने तालुक्यातील अल्पवयीन मुलीला पळवून नेण्याचा प्रयत्न हाणून पाडला. पुण्यात राहणारा हा इसम ज्यावर चोरी आणि इतर गुन्हे दाखल होते, त्याने कर्जत तालुक्यातील एका सधन कुटुंबातील अल्पवयीन मुलीला ऑनलाईन चॅटिंग करत आपल्या जाळ्यात अडकवले आणि संबंधित मुलीस पळवून नेण्यासाठी तो कर्जत मध्ये आला होता. मात्र रात्रगस्तीदरम्यान कर्जत पोलिसांनी संशयावरून त्याला पकडले आणि सारा प्रकार उघडकीस आला.
गेल्या पाच दिवसापूर्वी देखील गुजरात मधील एक मुलगा, जो कर्जत तालुक्यात स्वीट होम मध्ये काम करत होता, त्याने येथे नातेवाईकाकडे आलेल्या एका मुलीला गोड बोलून फूस लावली. त्याच्या खोट्या प्रेमाला भाळून ही मुलगी मुंबईकडे पोहोचली होती. मात्र कर्जत पोलिसांनी युद्धपातळीवर प्रयत्न करून तांत्रिक माहिती आणि तपासाचे कौशल्य पणाला लावत तिला मुंबईवरून परत माघारी आणले.
मागील महिन्यात देखील तालुक्यातील एका गावातील अल्पवयीन मुलीला ऑनलाइन गेम चा आधार घेत एका इसमाने पळवून नेले. परंतु तब्बल साडेसहाशे किलोमीटर अंतरावरून संबंधित आरोपीच्या मुसक्या आवळून संबंधित मुलीला त्याच्या नातेवाईकांच्या ताब्यात पोलिसांनी दिले. अशा घटना ऑनलाइन चॅटिंग मुळे घडताहेत. कोणतीही खरी माहिती व ओळख न देता पुरुषांकडून किंवा मुलांकडून मुलींची फसवणूक होत आहे. यासंदर्भात मुलींनी देखील जागरूक राहावे व पालकांनी देखील सावधानता बाळगावी असे आवाहन कर्जत पोलिसांच्या वतीने पोलीस निरीक्षक चंद्रशेखर यादव यांनी केले आहे.
वेळ निघून गेल्यावर उपयोग काय?
चंद्रशेखर यादव निरीक्षक कर्जत पोलीस ठाणे : पालकांनी आपल्या मुलांना महागडे मोबाईल देताना त्याचा वापर चुकीच्या पद्धतीने तर होत नाही ना? याकडे सतत लक्ष देणे गरजेचे आहे. कोणत्याही मुलीसोबत अशी घटना घडली तर सर्व कुटुंब व्यथित होते. पण अशा घटना घडूच नयेत म्हणुन पालकांनीही मुलींना सावध करावे, त्यांचे समुपदेशन करावे. वेळ निघून गेल्यावर काहीच उपयोग होत नाही. कर्जत पोलिसांची ज्या ज्या ठिकाणी मदत लागेल त्या त्या ठिकाणी कर्जत पोलीस मदत करण्यासाठी तयार आहेत.
